每輪英超後，球迷同傳媒都要搵啲罪人嚟插吓，已經變咗做箭豬嘅摩連奴呢周可以唞唞，輪到利物浦領隊高路普同門將卡利奧斯上場做箭靶。禮拜日英超尾場，卡利奧斯又犯錯，搞到利物浦喺領先下主場同韋斯咸踢成2:2，近兩場搞到紅軍失咗五分，被名宿加歷查鬧爆。
皮耶罰球欠角度照入
上輪利物浦作客以3:4不敵般尼茅夫，卡利奧斯已經孭晒鑊，搞到球隊由三分變零分。加歷查同加利尼維利兩位講波佬已經向佢發炮，但卡利奧斯好似嫌唔夠大鑊，走去還擊，話唔會理加利佬講乜。嚟到周日呢場，利物浦開局都幾順利，五分鐘就由拉爾拉拿入波領先，但喺27分鐘，卡利奧斯把關不力，令紅軍被追平1:1。當時皮耶嘅罰球唔算刁鑽，卡利奧斯其實都飛到，但就係畀個波入咗。前紅軍副隊長加歷查話：「呢球唔難救，佢企位OK，飛撲到位，但佢嘅手腕唔夠強壯。呢球唔係死角波，皮耶亦唔算射得好勁。大意失誤每個門將都會有，但我覺得失呢啲波嘅問題更大。」
名宿盡踩卡利奧斯
39分鐘，韋斯咸反先2:1，當時佢哋嘅長傳省到人，搞到利物浦中堅祖爾麥迪比判斷出錯，米查利安東尼奧單刀埋門射入。呢球其實麥迪比責任大啲，但加歷查照插卡利奧斯：「佢好似唔知應該點做咁，成個人呆咗。」加歷查仲叫卡利奧斯：「唔好講咁多嘢，做好份內事。」好在韋斯咸門將戴倫蘭杜夫用行動同卡利奧斯講「You'll never walk alone」，紅軍先保住一分。佢喺48分鐘犯錯，正想用手接實沙迪奧文尼嘅傳中時甩手，奧歷治輕鬆射入，幫紅軍追成2:2完場。
不過，始終紅軍關注度高，蘭杜夫幫唔到卡利奧斯分散外界注意。賽後網民圍插呢位23歲德國靚仔，仲話寧願米洛列特打番正選。已經攬咗卡利奧斯一場嘅高路普繼續撐，「大家都盡晒力！韋斯咸嘅入球，一個係精采嘅罰球，另一個係我哋唔好彩。」利物浦兩輪失五分，已經被榜首車路士拋離六分。