【拆 局】
隨着財政司司長曾俊華宣佈辭職、政務司司長林鄭月娥又計劃參選，再加上已經表態必定參選的葉劉淑儀，已知的建制派特首參選人至今最少已有3位，超過上屆唐英年與梁振英的二人之爭。有政界中人分析，今屆民主派在選委會人數議席大增，北京要操控選委難度更大，料中央未必容許3名建制派同時入閘，大有可能在提名階段篩剩兩名建制派，當中以葉劉被篩風險最高。
京盼下任特首多過689票
多名政界人士均指，中央希望下屆特首得票可以高票當選，「肯定要高過689票」，但現時民主派已手握逾300張選委票，「如果再有3名建制派同時入閘選特首，建制票會分散，風險高之餘，仲畀機會民主派造王」，所以他們均認為，中央未必容許3名建制派同時入閘，最有可能是在提名階段進行篩選，因為參選人必須至少獲150個選委提名，「最大可能篩剩兩個」。
另一政界人士相信，假若不計仍未曝光的「黑馬」，單以曾俊華、林鄭月娥、葉劉淑儀計算，葉劉被篩走風險最高，「林鄭有左派選委支持、曾俊華有商界同專業界支持，反而葉劉冇乜特定支持者」。他指若中央真的下令不給葉劉150個提名，「佢係最難喺非建制拎到提名，因為民主派一定唔畀佢」。
■記者莫劍弦