【八方相當年】
建制派新一屆立法會新丁中，民建聯張國鈞Horace相對比較低調，一直唔係打前鋒，可能同佢阿二命有關，「小學幾乎次次考第二，第一唔輪到我，咁樣壓力其實細好多」。
40歲嘅Horace有兩個女，但維基寫佢有三個，佢話冇錯，因為細佬早年意外離世，遺下嘅姪女佢當成親生女。本身係大哥有細佬同細妹嘅Horace大埔出世、幼稚園喺慈雲山木屋大，屋企喺佢小四時獲派屯門公屋。
由於父母都要外出工作，Horace小四時已經負責湊細佬妹放學同煮飯，奇怪係佢仲有時間做兼職賺零用錢，一至五天濛光5點半就落街叠報紙，6點幾開始派，7點零派完就換衫返學，「15蚊一朝，用幾蚊食完早餐，仲有錢做零用錢㗎」。咪睇佢斯斯文文，佢喺東華三院邱子田紀念中學讀書時原來係運動健將，試過喺運動會攞過7、8個獎牌，仲有學妹暗戀佢送禮物。
見習首日返工識老婆
明明中學讀理科，點解大學讀咗law？原來佢好迷《壹號皇庭》，所以令佢想投身法律界，加上曾目睹細佬爭啲俾差人疑似砌生豬肉，更佢想成為法律群英，最終城大法律系碩士畢業。加入法律界仲娶到個好老婆，因為張太就係佢做見習律師首日返工時認識㗎嘞。
