喺9月立法會選舉時稱受壓棄選嘅自由黨周永勤，噚日朝早喺fb發表公開信宣佈退出自由黨，退黨信係畀「尊敬的田北俊榮譽主席、各自由黨領導」，劈頭大讚田少「憑良知，求實事」，若對方日後參加新東補選會幫手拉票，繼而指近日新任行政會議成員暨黨主席多次透過中間人勸佢退黨，加上「最近公開表態有意晉身全國政協的黨魁」唔肯幫佢位於天華邨嘅辦事處續約，認為兩件事加埋動機路人皆見。
鍾國斌同八方講，黨紀律委員會正就周棄選展開調查，此前周嘅黨籍被凍結，「咁又點會用黨嘅名義幫佢續約個辦事處？」鍾更指周對棄選好多嘢唔肯講；對於周暗示佢有意擔任全國政協委員，鍾仲反駁對方老作。