特首梁振英上周五突然宣佈不爭取連任，民主派對此突如其來的「喜訊」除了感到興奮，亦對建制派、梁粉「跟車太貼」、四出「實牙實齒」說梁必定連任卻集體「炒車」的下場無不暗暗恥笑。有政界中人指，今次梁突然被判「死刑」，最受打擊其實是西環及一眾向建制派「點紅點綠」的「權威消息」，「以後仲有冇人信佢哋可代表中央？」
「冇諗到唔代表中央」
多名民主派及政界中人笑着對季陶說，今次梁突然宣佈不再連任，事前建制陣營、梁粉完全收不到消息，「有梁粉星期三仲同我講，CY係100%連任當選，絕對冇懸念」；另一政界中人稱，他周四晚在一個聚會碰到一名商界中人，對方由唐營轉投梁營，他在聚會中引述「北京權威消息」、「中聯辦人士」稱，「好肯定中央支持CY，等CY12月上京述職，中央會有明確支持佢連任，最多都係畀葉劉陪跑，其他人包括曾俊華係連閘都未必入到」，對方還開出「一餐飯博10餐」盤口，押注梁必連任，「第二日佢即刻衰咗，我whatsapp笑佢，佢完全唔覆」。
有政界中人直言，今次一眾梁粉、建制派在梁連任問題上集體「炒車」，全因他們北京港澳系統以及中聯辦不斷放風，「張德江係挺梁、中央支持強硬路線，再加埋張德江又見周融又支持釋法，冇人會諗到原來西環係唔代表中央」，今次西環在梁宣佈不再連任前，完全收不到任何消息，「有建制派人士開始諗，以往西環代表所謂中央權威消息，仲有幾權威可言？」更有一名建制中人對他說，「以後西環再話中央挺邊個、唔挺邊個做特首，真係唔會再信」。
季陶
周一、三、五刊出