走咗689，如果換嚟葉劉；大家係咪依舊有氣冇碇唞？其實唔少民主派人士都好怕大家因為梁振英唔爭取連任而鬆懈，懶理接任特首嘅人係邊位。港大法律學者、佔中發起人之一戴耀廷喺facebook提提大家，「689並不是梁振英的專號」，點解呢？
戴耀廷話喎，689呢個數字代表緊中共可以直接操控嘅政治力量，「中共把689加持給任何人，那人也即時變身成為689」，所以689其實係香港政治生態下嘅政治物種，梁振英只係呢個物種之一，「故此反689不是單純反梁振英，而是反所有梁振英的同類」。
689仲有乜同類？佢喺fb貼出「掃把螳螂」同「大膽鵝」公仔（圖），代表緊邊啲人呼之欲出。佢仲溫馨提示大家，「689也會進化的，有些比梁振英更聰明，會發展出保護色，不會給人一眼認出就是689，故我們要有智慧去辨識出真正的689」，唔知葉劉同林鄭點睇戴耀廷呢番言論呢？