八方之前同大家講過，香港首位女聖誕老人Santa Kiwi已經同師兄Santa Apple啟程去到瑞典北部小鎮耶利瓦勒（Gallivare），參加有聖誕老人奧林匹克之稱嘅國際聖誕老人運動會2016。
參戰國際運動會
呢對港產聖誕老人團隊過五關斬六將攞到季軍，成績算好好嘞，因為Santa Kiwi嘅聖誕老人年資只係得一年㗎咋！
今年喺港區選拔賽中勝出嘅Santa Kiwi只有153厘米高，但身形細粒反而令佢喺三項鐵人賽中展示出平衡力同靈活性。
而熱愛極限運動Parkour嘅Santa Apple則有膽識、體能同應變能力，據知佢哋兩位喺賽前每日進行Santa特訓，練習包禮物、跳舞同地獄式訓練體能，為參賽做好準備。
原來Santa Kiwi更係呢次比賽中唯一嘅亞洲女性，佢話出發前好緊張，好彩獲師兄送上鼓勵，「有些事情一個人完成可能不行，但有多個人合力完成一定可以！」