原本俾建制派吹到必定連任嘅特首梁振英，突然間話因為家庭問題唔選，一班已經暗暗開工為佢搞連任嘅梁粉即時唔知點算好！好彩同建制派、梁粉關係唔錯嘅政務司司長林鄭月娥轉軚話會考慮參選，一班梁粉終於有着落，政圈仲有人講爛gag，話梁粉可以變身奶粉！但有奶媽支持者話，梁粉良莠不齊，奶媽真係要小心！
「畀張志剛你 有得推咩」
今次CY突然話唔選，據知梁粉事前真係唔知情，有啲仲幫CY排緊地區活動拉票；上周五政府突然話CY開記招，最初有梁粉以為CY得到中央開綠燈，宣佈參選；𠵱家CY忽然話唔選，成班競選班子即時唔知點算好。有政界中人同八方講，奶媽林鄭決定選，背後有一班建制同左派人士支持，據聞一啲有份量嘅梁粉亦會挺林鄭，所以有傳梁粉班子可能轉為林鄭助選，因為林鄭係短時間內未必趕得切另起爐灶。
有林鄭粉絲就對梁粉變奶粉有保留，認為梁粉陣營不乏有料之人，好似行會成員陳智思，佢同林鄭一向有合作，由梁粉變奶粉合情合理；但梁粉中乞人憎者亦不少，再加上有啲背景有問題，如果林鄭照單全收，「咁就會變成毒奶粉，飲咗可能會中毒」。但正如一啲民主派中人話，林鄭要跑出就要靠左派同西環支持，「到時人哋塞個張志剛畀你都要收喇，佢有得拒絕咩！」
李八方
MAILTO:[email protected]