持有多個物業嘅藝人白韻琹（Pamela）與立法會議員謝偉俊（Paul）再度入市（力證兩人情比金堅喎），而且買樓速度如買菜，睇樓5分鐘即扑槌，豪花6,660萬元購入西半山新盤特色單位，且另外要付約1,000萬元加辣稅款。
由豐泰發展嘅西半山干德道頭段單幢盤「敦皓」近日開放現樓，噚日以招標形式售出5樓C室花園平台特色單位，成交價6,660萬元，實用面積1,332方呎連1,376方呎平台，呎價5萬元，屬項目成交呎價新高，市傳買家係Pamela與Paul。
華華噚日搵到Pamela，佢話購入上址用作自住，「佢特色單位嚟，有個千三呎大花園，望住下邊個泳池，好似可以喺單位跳落泳池咁，好難有層樓我一睇就覺得好鍾意，所以用咗5分鐘就決定買佢」。不過，Pamela都覺得樓價好貴，而且需要繳付嘅印花稅達千萬元都幾肉赤，「政府大咬得濟」！