養小動物真係要好有愛心，照顧一條小生命到死去，花費嘅心力可以係好大好大。有一班藝人，深明呢個道理，仲將呢種愛拓展，收養一啲無家可歸嘅動物。
姚子羚：
子羚3年前收養咗唐狗「通仔」，不過今年初佢俾通仔咬傷臉孔，隱約留下爪痕、咬痕 。子羚事後派定心丸：「冇毀容，唔會因為咁遺棄動物。」
黃子華：
子華神充滿愛心係人都知，之前幫過「惜食堂」拍宣傳片，呼籲香港人出心出力。今個月初，佢再出席支持領養寵物活動，仲透露收養咗隻流浪狗，互相適應咗三個星期。
傅明憲：
傅明憲作為香港愛護動物協會會長，一直關心流浪狗問題，上年佢喺facebook留言，話漁護處發現有隻狗仔流落街頭，仲面珠潰爛，傅明憲大為心痛，決定收養。
汪明荃：
汪阿姐同老公羅家英一向愛狗，上年佢哋養咗十幾年嘅狗仔Momo病逝，為咗幫另一隻愛犬搵伴，決定收養多一隻唐狗BB。
河國榮：
真．香港人河國榮試過15個月內收養9隻狗，第一隻收養嘅愛犬Dallas，係河國榮所住嘅村內一隻流浪狗，有次佢見到Dallas俾人毆打到起唔到身，決心養育。