徐淑敏（Suki）今年9月飛日本學煮藍帶法國菜，為期3個月，家人都車輪轉飛去當地探佢，日前Suki同老公黃浩、兩歲多細女黃沁誼（Isabella）、媽咪、奶奶同家姐去咗影和式全家福，全女班換上和服，拍攝三代同堂美女圖，只有Kenny未變身，佢話影樓未有提供男服，佢只得幫手湊女，而囡囡嘟嘴扮萌最搶鏡。
叫埋奶奶
問到Suki點解影和式全家福？佢話：「Isabella見到影樓海報，佢主動話要影，咁我媽咪都好開心，佢話影和服相係其中一個心願。」所以Suki就完成媽咪同囡囡願望，仲叫埋奶奶同家姐齊齊玩。
Suki話：「陪佢哋玩，做佢哋化妝師。」呢輯相由日籍攝影師指導擺甫士，着住和服嗰陣，雙腳應該合埋，工作人員幫Isabella合埋對腳仔，佢又故意伸開，Suki笑話：「佢好貪玩，工作人員覺得佢kawaii。」
撰文：馮仁昭
