紅燈同綠燈呢排成為全城佳話,到底曾俊華會唔會衝紅燈,林鄭月娥係咪已獲中央畀綠燈?相信暫時都冇人知,所以有票在手嘅人都係企定定睇定啲先,勢估唔到港鐵主席馬時亨都話見到紅燈,乜佢都選特首兼被阿爺DQ咩?非也,原來係佢嘅家人對佢重返政府做嘢亮出紅燈!
肥馬接受無綫《講清講楚》訪問時斬釘截鐵、第N度重申四無立場:無心、無意、無計劃及無打算選特首。身為前高官嘅佢會否重返熱廚房,幫幫下屆特首忙?佢話屋企人對此亮紅燈,自己從事乜嘢工作都要交由屋企嘅3個董事長話事,即係太太同兩個女,表明唔會喺下屆政府做全職工作喎。
咁佢對特首人選有乜心水條件?肥馬話必定要有服務香港嘅心,若果只係因為自己嘅野心而去爭,對香港唔係好事。而有心有力、做好溝通工作以及修補𠵱家撕裂嘅情況,佢都覺得係所需條件,尤其要有「人和」,否則好難政通人和。至於班底當然一定要夠強,而且同時要有新思維,咁先令人有希望。雖然梁振英有好多問題俾人批評,但肥馬覺得現屆政府增加土地供應同建屋量等施政方向,都可以延續㗎。