年約27歲嘅林建億，喺外國留學同長大，正宗鬼仔性格，加上佢嘅富二代身份，真係城中筍盤。
其實林建億好耐之前已經經常流連夜場，又不時上載與女伴夜蒲親熱照到網上，《蘋果》曾經喺前年影到佢夜蒲時，攬洋妞勁high，更當眾揸籮狂啜、舊年又被影到，到兩個月前，林建億就被影到當街剝衫冧女，仲一支果汁兩份飲，風流史水蛇春咁長……
近年林建億分別係中環同西環開餐廳，又有份投資著名夜店Volar，另與友人合資開製作公司，所以佢根本就係派對常客，加上佢擅長亦愛搞派對船P，出手又豪爽，所以身邊嘅女伴轉不停。據知林建億追女直接，遇啱獵物就直接問人攞電話同facebook，專攻散餐。