今日沙田舉行「香港國際大賽」，必有一時之盛，全場爆棚。適逢今日又係選舉委員會競選投票之期，不少人（尤其係馬主及馬會會員）要趕去投票，好唔得閒，最好係上午投票，之後入馬場，否則會心掛掛。唔好以為選委只是小圈子選舉，好多專業人士有選舉權㗎，泛民有三百幾人參選，選舉結果對下任特首選舉有好大影響。昨日睇到一啲電視記者訪問參選人，大都話未必擁梁，左丁山不禁大笑，因為受訪者幾乎個個係梁粉，梁營中堅分子，佢地當選後會唔擁梁，講笑咩。但係現在梁振英已玩完，講什麼ABC，NBC都係嘥氣咯。
「滿樂時」係今日最穩陣嘅熱門馬，日本去年奪得香港盃與一哩錦標，大獲甜頭，今年派出13匹馬來港搶獎金，其中必有王者興。第8場係全日戲肉，頭馬獎金1425萬，左丁山參考日本馬專家肥仔K提供嘅資料，認為2號「滿樂時」去年跑一哩錦標，輕易取勝，今年增程跑2000米，豈會打無把握之仗，10月30日贏秋季天皇錦標，姿態輕鬆，今日贏面壓一。上屆冠軍「榮進之光」在秋季天皇錦標大敗，今日要衞冕有難度，香港馬就有老兵3號「威爾頓」、4號「將男」、8號「天才」可以一爭。一於2拖3、4、1、5、8。
第七場香港一哩錦標（1600米），頭馬獎金1311萬，擂台躉1號「步步友」已非當年勇，呢場隻隻馬都有機會，日本馬有三隻，實力唔會叻過香港馬，實力平均之至，幾難揀中一隻馬膽，唯有選1號「步步友」、9號「美麗之星」、8號「包裝奔馳」、6號「喜蓮獎星」四隻互串，冷腳加埋4號「大印銀紙」及捧新亞校友賴偉志嘅14號「壯思飛」。第4場香港瓶（2400米），頭馬獎金940萬，1號「高地之舞」實力最高，日本馬三匹，以13號「新紀錄」最正，可以威脅，兩隻馬應可控制大局，其他馬似乎差一皮，買1號、13號食餐，希望跑出大冷腳。第5場香港短途錦標（1200米），香港馬可以贏頭馬獎金1054萬嘞，1號「友瑩格」、2號「幸運如意」、3號「幸福指數」大可包辦三重彩，搵埋4號「新力風」、9號日本馬「彎刀赤駿」，買複式四重彩，希望收錢。第九場當然係捧新亞校友隻馬2號「一片光明」加埋1號「活力小駒」；9號最有機會贏頭馬，不過呢三隻熱到無味，要搵冷腳，就係8號「嘉福」、11號「心花怒放」，左丁山當然主觀希望「一片光明」跨入凱旋門！