【港隊危矣?】日本大軍歷來最強 馬會隨時獻上半億獎金

【港隊危矣?】
日本大軍歷來最強 馬會隨時獻上半億獎金

今屆國際賽即將上演,最大特色係日本隊好強,全日四項錦標都有馬上陣,一共13匹歷屆最多,其中香港瓶「新紀錄」、香港短途錦標「大仁大勇」、香港一哩錦標「標誌名駒」及香港盃「滿樂時」,都是餐士馬,一副搶錢格。

如果日本隊贏晒四場,夾埋頭馬獎金係天文數字,有成4,731萬,而且最後埋單分分鐘唔止此數。因為第八場香港盃日本隊大嗱嗱出五隻,包辦三重彩都唔奇,即係今屆國際賽日本隊最完美嘅情況,可以攞獎金超過半億。

日本馬王「滿樂時」之前來港兩次,先贏香港一哩錦標,擊敗「大印銀紙」;繼而喺冠軍一哩賽,再挫港隊馬「詠彩繽紛」。今次「滿樂時」第三度征港,意義重大,除咗係退役前告別戰外,亦可再締紀錄,如果牠贏到香港盃,不但可與昔日「榮進寶蹄」看齊,成為另一匹曾三度在港勝出國際一級賽之外隊馬,「滿樂時」在港累積獎金亦會超過3,500萬,係賽馬史上在港取得獎金最多嘅外隊馬。