東方龍獅籃球隊上周六喺東南亞職業聯賽（ABL）作客越南，以84:74擊敗西貢熱火，拎到ABL四連勝！西貢熱火嘅實力雖然同NBA邁阿密熱火有距離，不過都有前NBA爵士球員壓陣──身高6呎10吋嘅中鋒希拔希爾（Herbert Hill）喺籃底都幾屈，貢獻全場最高29分，好彩東方就算有「亞援」林泰樂因傷缺陣，依然保持準繩外投，仲喺第三節打出26:14嘅攻勢反超前，最終反勝10分。東方全隊有五位球員得分雙位數，最威係個人攻入25分嘅艾利諾；佢哋22號會回師主場對新加坡騰飛之獅。連續兩場當選MVP嘅李琪話贏波靠晒全隊合力防守，又話近排體重穩定番，所以射波穩定性高咗。