杜如風昨日忽然在微博貼出瞓醫院相，她大呻：「其實係因為自己百厭得滯，成日追趕跑跳碰，結果斷咗條膝頭哥嘅十字韌帶，要做手術駁番，我終於都入埋香港嘅醫院啦！」原來她跛腳斷十字韌帶，前日入院做手術。
學泰拳傷膝
記者昨日致電杜如風，她表示年半前學泰拳傷右膝，當時未有留意，其後到日本拍外景再傷舊患。她說：「最近拍廣告，咔咔咔終於扭到三節，我行路開始拐吓拐吓，一隻腳冇力，長短腳，阿媽叫我睇骨科，照X光同去磁力共振，原來係十字韌帶前面斷咗，仲要融埋，應該我捱咗好耐都唔知。𠵱家就駁番十字韌帶，做完手術，半月板有磨損，𠵱家傷口唔痛，可能有止痛藥，要吊鹽水同葡萄糖，醫生話兩、三個禮拜後可以行，但要做物理治療，我成日就係冇心機做。」留院的杜如風笑言有媽咪監察，飲食要戒口。
採訪：陳杰