香港高爾夫球公開賽噚日繼續喺粉嶺哥爾夫球場舉行，頭兩日一直領先嘅西班牙球手貝羅，噚日打出平標準嘅70桿，繼續以總成績低標準11桿領先，但佢已經俾噚日打出低標準三桿嘅澳洲球手森巴素追上。（now684台今日12:00pm起直播）
衞冕羅斯10桿大墮後
貝羅經過頭兩日賽事仲領先緊森巴素三桿，佢哋噚日同組一齊打，森巴素就發揮得好啲喇，一共打出四隻小鳥，造出低標準三桿嘅67桿，總成績係低標準11桿嘅199桿；至於貝羅就喺第13洞犯下大錯，將個波打咗出石屎地，最終佢喺呢個被稱為全場最易打嘅洞，只係打出平標準桿嘅五桿，跟住又喺第14洞打出雙柏忌，全日打出平標準桿嘅70桿。英格蘭球手費列活就以總成績低標準九桿守住第三，但佢位同胞、奧運金牌得主羅斯呢日只係平標準桿70完成，三日過後已經落後榜首10桿排並列47位，衞冕已經冇乜希望。
後上嘅森巴素就話，自己喺第一洞有啲緊張，但之後調整番，仲話呢個比賽好好玩：「喺度打波好正，開頭有啲緊張，可能因為嗰陣排緊第二啦。聽（今）日我開始打嘅時候，會嘗試做得好啲，然後享受比賽同現場氣氛。」講到今日嘅最後決戰，貝羅就話：「我同森巴素是但一個打得好，其他對手就可能打得較心急。」佢又話自己好有信心，一啲都唔緊張！