造成71人死亡，包括19名查比高恩斯球員嘅哥倫比亞空難，對查軍嚟講係永不磨滅嘅悲痛歷史，但亦要重新振作，抹走眼淚向前行。球會已經展開重建工作，上周五落實聘請華拿文仙尼擔任新教練。不過，延至今日上演嘅巴甲煞科戰，查軍就唔會出戰。
請華拿文仙尼做新教練
華拿文仙尼教過山度士同華斯高等大球會，但最出名係帶領中小型班踢出比預期好嘅成績；最經典係喺2005年帶低組別球會保利斯達贏巴西盃。文仙尼上任後，即刻要着手羅致新球員，因為慘劇後查軍得番六個職業球員；早前有傳朗拿甸奴同列基美等名將都願意免費加盟，但唔知係咪真。
另外，據報空難每位死者嘅家屬只得約15萬美金（約116萬港元）賠償，原因係航空公司嘅最高保額只係得2,500萬美元。
周日將會上演因空難延咗期嘅2016年球季最後一輪巴甲，得到對手明尼路同意下，查軍唔會踢煞科戰，而其他比賽都會進行致敬儀式，包括賽前奏出查軍會歌，同埋各隊喺波衫印有支持查比嘅語句。九場煞科戰得幾隊仲有嘢爭，包括自由盃外圍賽席位同剩番一個降班位誰屬。