噚日全城最好賣嘅可能係香檳，皆因唔少人都話梁特DQ得人多，今次俾阿爺DQ，認真大快人心，唔慶祝吓都唔得。其中公民黨黨魁楊岳橋喺Instagram貼咗張鬼馬相，相中見佢攞住支叫SIX EIGHT NINE嘅紅酒，留言話「689好酒」，hashtag#我知唔好咁快開心住要轉嘅係制度、#但你都畀我開心一日先吖，同時提選民慶祝還慶祝，聽日記得要喺選委會選舉投票，相信係驚大家樂極生悲，令民主派喺選委會失守。
人民力量前立法會議員陳偉業都喺fb上載咗張相，見佢同社民連梁國雄搭晒膊頭嘆紅酒，其他相可見現場仲有好多美食，應該係開緊party，普天同慶689下台，相信同唔少市民一樣心情興奮。