好事要成雙，唔通刀片信都要打孖嚟？繼被取消立法會議員資格嘅青年新政梁頌恆噚日收到刀片恐嚇信後，佢嘅黨友游蕙禎噚日喺facebook發帖話收到立法會轉交嘅郵件，同樣收到一封刀片恐嚇信。信中字迹潦草，以五線譜作信紙，同「梁天恆」收到嘅信件好鬼相似。
信中上款寫有「反共分子、雞」，下款則用簡體字寫上「老江軍地下黨」，內容為「一定要剎（殺）死你，誰反共，必定要死，非死不可！你一定要報警！」當中部份字體以簡體字寫（無錯，向「梁天恆」發信嘅都係簡體字人），又喺「你一定要報警！」一句畫上底線作強調。附上嘅一片𠝹刀片，同樣都係有銹迹㗎！
游BB喺帖文寫道，「殺，戮也。从殳杀聲。凡殺之屬皆从殺。剎，柱也。从刀，未詳。殺省聲」。游BB真係有文采！