今周的英超大戰，球迷多認為是曼聯對熱刺，或者「雙城記」，即李斯特城主場鬥曼城。不過賭波從來不需要好睇，周六11點場有水晶宮作客侯城，比賽未必可觀，水晶宮卻甚為穩陣，就算作客讓波仍要博一鋪，收完錢才睇「雙城記」豈不更妙？
已是12月初，天文台剛預告下周轉冷，也意味聖誕快車就到，英超列強也要為這個全球最艱辛的賽程費盡心機。雖然只打了14輪，但初步來看，第13位的米杜士堡以下，全部都要爭分護級，否則待一月再追已太遲。看衞冕的李斯特城居然「琜爛面」，換足10個來戰歐聯，結果慘吞五蛋，就是留力準備聯賽迎戰曼城，務求全取三分。
講到水深火熱，排尾二的侯城比李城更差。近12場英超只贏得一場，死症是火力太差，踢了14場只入得11球，攻力在英超包尾，其4-1-4-1陣式基本上是死守為先，再靠死球或突擊搵食，可惜其成績就證明了不奏效，因為單箭頭的迪奧文迪目前只入一球，球隊全靠辛迪加斯「士哥」。就算此子已有四球在手，仍不足以回天。
水晶宮踏入12月之前，一度在英超連輸六場，幸好上仗主場大勝修咸頓，成功止血。話雖如此，以水晶宮實力，今周對住侯城當然是以三分為目標，而且卡比耶復出，賓迪基（左）在前線可望有更多供應。以水晶宮的排名，作客讓波有點過份，但亦可視為莊家睇淡「老虎」，既然如此，就信水晶宮再下一城。
仙道彬