嘩，噚日真係香港大奇蹟日呀，特首梁振英竟然宣佈唔選，震撼成個香港。查實梁特喺宣佈棄選前，有項公佈亦大快人心，佢宣佈委任商務及經濟發展局前局長、港鐵主席馬時亨做香港教育大學校董會主席，任期明年4月25日起生效，為期3年。
人人以為梁特只識用梁粉，今次委任肥馬，當然係讚多過彈。由商入政再殺入運輸界，到𠵱家教育呢瓣都撈埋，肥馬涉獵嘅世界認真夠晒大。據聞佢對教育極上心，覺得教師對新生代發展路向好重要，所以一定要好好培育教育人才。
教育局局長吳克儉歡迎肥馬出任教大校董會主席，話肥馬喺商界同公私營機構都擔任過主要職位，其後又做官，具備豐富商業管理同公共行政經驗，係傑出社會領袖，深信肥馬可以帶領教大精益求精，續創佳績。佢同時多謝即將卸任嘅教大校董會主席彭耀佳，讚揚喺對方領導下，教院今年獲授予大學名銜。
教大校長張仁良就話對肥馬嘅任命感到高興，指肥馬無論喺公營或私營機構都擁有豐富經驗，期望同佢緊密合作，帶領教大再創高峯。