騎師喺香港想成功，除了要騎功好，當然亦要交際好，識得搵廐主們支持，綽號猛人輝的蘇兆輝，就上述兩項條件都齊，因此雖然只係客串性質，但亦不愁寂寞。
好似今朝沙田晨課，猛人輝就特登走去烽火台，同葉楚航及蘇偉賢等練馬師埋吓堆，順便研究一下周日(11日)搏殺大計。今期猛人輝與蘇偉賢合作第六場一班1400米之「世澤之星」，此駒上仗初跑同程即勝，強如「威力川」亦埋唔到身，今次再遇「威力川」，「世澤之星」不但有一檔，而且仍只負119磅，不難再下一城。
至於葉楚航有第10場二班1600米的「小米周」交俾猛人輝操刀，今朝「小米周」由猛人輝喺大圈出跳，出試前葉楚航一直跟住隻馬，向猛人輝交代操練細節，明顯非常緊張，看來今仗志不在小。「小米周」曾由猛人輝兩戰同程田草1600米得一冠一亞，今仗人馬重逢，必定鬥志如虹。