梁振英宣佈唔連任特首，按內地官場慣例，例必要風光大葬，內地嘅講法係有番啲「體面」離場，難怪港澳辦同中聯辦都分別出稿回應，但若然細心閱讀兩辦聲明，不難發現當中莫大分別，仲可以引證西環撐梁嘅消息。
491字讚推動民主促進和諧
港澳辦嘅回應短短243個字，既表達對CY決定深感惋惜並予以尊重，亦評價CY任內嘅工作，包括讚揚佢穩妥處理了一系列重大政治法律問題，同時讚佢帶領港府及社會各界喺發展經濟、改善民生同推動中港交流合作取得了積極成效。
中聯辦則足足用咗491個字回應，比港澳辦多一倍，港澳辦有提及嘅西環都有，而西環特別之處係加插讚揚CY依法施政、廣泛凝聚社會共識、推動民主、促進和諧，呢啲全部都被認定係CY嘅弱點，可圈可點嘅係西環特別讚佢喺應對佔中、打擊港獨上敢於擔當，仲有堅決維護國家主權和安全，「表現出堅定的愛國愛港立場和駕馭複雜局勢的能力」，強硬立場據聞同西環領導層一脈相承，可惜勁草都都頂唔住北方來嘅疾風。