「差不多冬至，一早一晚還是有雨，當初的堅持現已令你很懷疑……」八方忽然好唱口，只係感慨舊年嘅冬至之日，正是政府公佈退休保障諮詢之時，等咗差唔多一年，諮詢報告預料本月底公佈。雖然政府打晒開口牌，話要適當運用資源，民間爭取30年嘅全民退保可能等到尾都只係得枯枝，但香港人向來都唔認命，點會咁易放棄？
全民撐退保聯盟最近舉辦「有圖有真相」作品招募行動，邀請全港市民參與，以「如果有……全民退保@HK」為題，作品無論拍攝或二次創作都得，總之借圖發揮，再配以50字內容，宣揚支持落實全民退保嘅訊息。
作品招募由即日起至明年1月1日，聯盟之後會選出入圍作品，再上載到聯盟專頁畀公眾人士投票。活動設最正訊息大獎及最具創意獎各1名，獎金1,000蚊；另外有3個最勁呃like獎及5個優異獎。獎金都係錦上添花，最重要係話畀政府聽爭取全民退保嘅重要性，同埋好多人係未放棄。詳情可瀏覽： https://www.facebook.com/WelfareSupportURS 。