里奧男子高爾夫球金牌得主兼爭衞冕嘅英格蘭球手羅斯，噚日喺粉嶺香港哥爾夫球會舉行嘅香港高爾夫球公開賽次日賽事，打出低標準桿一桿嘅成績，並列38位，順利晉級今日嘅比賽。首日已經領先嘅西班牙球手貝羅，噚日再打出水準，造出全日最佳嘅低標準桿五桿，續排榜首。（now684台今日12:30pm直播）
受腰傷困擾嘅羅斯噚日由後九洞開始，全日打出三隻小鳥同一個柏忌，以總成績低標一桿並列38位，有驚無險咁晉級第三日賽事。其實，羅斯打到一半嘅時候，成績係高標一桿，佢話當時意識到自己喺淘汰邊緣，所以好慶幸能夠喺最後九洞打出小鳥。佢又話今日打得比噚日順，而且傷勢康復緊，相信好快就可以回復100%狀態。
至於曾兩奪歐巡賽嘅32歲西班牙球手貝羅，繼首日之後再有好表現，全日打出六隻小鳥，以總成績低標11桿排榜首。對於連續兩日高居榜首，佢就話感到欣慰，但最重要係有穩定嘅發揮：「我控制好自己，好少會打出一啲波令自己處於危險位置。」貝羅又話唔會因此而滿足，只希望盡力做到最好，證明自己已經成為一位更好嘅球手。
「六師弟」小鳥多過榜首
至於香港業餘球球手「六師弟」黃永濤就打出高標三桿，以總成績高標九桿，並列118位完成賽事。雖然無緣晉級，仲打咗兩次三柏忌，但一共打出七隻小鳥，仲多過貝羅，佢就話滿意表現，又話經過呢個比賽後，學到專注嘅重要性，同知道自己同職業球手差幾遠喎。