被DQ立法會議員資格嘅青年新政梁頌恆，續成唔少人嘅狙擊對象，佢噚日喺facebook話收到立法會轉交嘅郵件，當中有封刀片恐嚇信（圖），上款寫住「反共分子」，下款就用簡體字寫住「地下党红军战士」，內容係「叫你老煮一餐好吃給你吃 否則沒有幾日命，那反共必定剁死它，非死不可！你一定要報警！」信件仲附有銹迹刀片一片。
梁頌恆喺fb揶揄恐嚇者：「呢位字迹潦草嘅『地下黨員』，下次寫恐嚇信可以寫得清晰一點，亦唔好寫殘體字，否則被恐嚇者會睇唔明你喺度恐嚇甚麼的」。佢坦言擔心安全，連月與家人受盡各種滋擾，亦對連累至親好唔安樂，「恐嚇的話請繼續來找我，不要牽涉我的家人」。
梁頌恆同時嘲諷警方近來「忙於質疑自己嘅認人能力同研究點樣話條電視片段有被剪接」，「無謂再去打攪佢哋啦」，似乎無諗住報警噃！
有網民周二則喺fb上載短片，可見梁頌恆被多角度追拍，有女人鬧佢「支那狗」，又嘲諷話「無議員做啦佢」，梁則一直用手機冇理。佢回應傳媒時指事發約兩星期前，不時受到類似指罵同騷擾。