前排特首梁振英谷住眼淚話「粒粒皆辛苦」，立即博到唔少曝光機會，可能食過翻尋味，呢輪馬不停蹄秘密落區嘅佢，噚日佢着住恤衫、西褲加皮鞋，去到大埔一間小學玩割稻米，唔知係咪想喺跑馬仔激烈賽事中寓意「得米」，但肯肯定係想再出番金句「粒粒皆辛苦」。
問車位供求 講《基本法》
梁振英噚日又落區，一如近來情況都係冇通知傳媒；呢次輪到去大埔一間小學同十幾位同學割米，然後再去飯堂食飯。呢次佢唔止放相喺facebook，連片都放埋。喺條片入面，見佢成個熟手技工咁樣，拎住把鐮刀喺度收割，割得似模似樣呀﹗
跟住佢仲帶住幾位小學生一齊割。八方起初以為呢啲叫做割禾青，不過諗諗下都唔啱，禾青係未成熟嘅，而梁特割嘅係成熟嘅，所以應該叫「得米」。其間佢問學生收割嘅稻米可以製成幾多米飯？學生答佢只能作一碗，佢立即笑言「真係粒粒皆辛苦呀係咪呀？種咁多原來得一碗」，擺明係想重溫自己嘅金句。
而佢同50位四至六年級同學對話時，談及嘅話題包括房屋供應、考試、《基本法》嘅執行、大埔嘅停車位、填海增加土地供應、獨居長者嘅照顧等，唔少網民都質疑係乜玩法？大人講嘅意見又唔聽，反而向小學生講呢啲，係咪好離奇先？
李八方
mailto:[email protected]
