又到聖誕，又到聖誕……港交所（388）行政總裁李小加今年再度參加《南華早報》與RTHK Radio 3合辦嘅「愛心聖誕大行動」，除幫手做breakfast talk賣飛籌款，亦有意加碼拍賣「小加午宴」㖭。
李小加舊年參加活動得到唔錯嘅反應，所以今年再下一城，第一波係今早8點至8點半，喺港台第三台節目《Money Talk》，同主持人一邊食早餐一邊做直播，大家可以「烽煙」問李小加問題。
呢個活動，之後會有不同善長捐出物資做拍賣，而活動主辦方當然想善款多多益善，所以提出想李小加拍賣一場午宴，有心人可以上網入標，暫時未知底價同詳情。大家有興趣同小加食飯就留意喇。