明明綠燈轉眼變成紅燈？八方相信，暫時無論乜色嘅燈都唔會嚇窒鬍鬚曾，佢嘅啦啦隊依舊積極拉票冇分心。而喺梁特搞夜會同梁粉密密斟之際，鬍鬚曾都唔執輸，前晚相約民建聯新一屆立法會議員飯敍。雖然鬍鬚曾疑似被跣嘅羅生門，成為全香港人嘅剝花生熱話，但據聞呢單甩轆事件，席間竟然冇談及，全場都係風花雪月、嘻嘻哈哈。
八方問過有出席嘅民建聯中人，無不話呢餐飯宴都係旨在交流溝通吓，席間鬍鬚曾主要提及嘅係喺美國生活經歷，全程冇講to run, or not to run，唔知係咪民記始終唔係「自己人」，打交道使乜咁上心？據聞席間都有談及照顧小朋友同貓貓狗狗等，但點解唔問係咪「衝燈」？有民記中人話，呢啲跑馬仔敏感時刻，凡事要小心。