這個星期的焦點股，肯定包括「越南河粉」膳源（1632），差不多日日有炒股朋友奔走相告，例如話有人3蚊買入，6蚊沽出，賺過十萬元；又翻查分配結果，有137人各獲分配9萬股，若他們於高位17蚊沽貨，七日賺過百萬，單是用來起題，已經夠晒吸睛。
股票市場就是充滿這些誘惑，一隻股每日升幾個或幾十個巴仙，散戶第一日、第二日不跟，第三日可能就忍不住手，結果往往是損手收場。
早前有位媽媽級的朋友問到如何投資，買邊隻股票好，答案其實好廢好老土，一要睇閣下有多少錢，5萬與500萬是兩碼子的事；二要睇閣下能忍受輸幾多錢，需知道散戶一買、股價就跌的例子比比皆是（本人中不少），坐得起艇才好買股票，否則心理壓力不少。
最重要還是講性格與能力，有炒股朋友心理質素奇佳，贏輸100萬也可以無反應；有賭徒朋友甚至可以同一時間管理幾十隻股票，全部股價、銀碼心中有數。我自問無此本領，同一時間管理5隻股票，便會發癲，如當中有一隻股票坐艇，便足以令我陷入抑鬱狀態。因此，我只會選擇「舒服股」，有股息收之餘，內心得到平靜是最緊要。
高淑嫻
https://www.facebook.com/koc9nine