星島新聞集團主席何柱國5年前嘅噚日正面抽擊梁振英，質疑CY當選，香港會一鋪清袋，仲寸爆話邊有人紮腳紮3隻腳指等，暗示佢講嘅往事不盡不實。CY喺炒何開聲後翌日、即係5年前今日還口，但出奇地態度冇之前咁強硬。
CY當時話自己管理嘅公司係亞太區嘅業務，每年以億元計嘅盈利，相信「呢啲方面應該可以檢視我嘅經營能力」。至於被指一直唔肯辭去星島非執董係為咗保留份袍金收入，佢亦否認，但言談間唔再牙尖嘴利，唔通係炒何嘅氣勢太勁？
5年前今日其實仲有另一單「趣聞」，就係CY嚟咗將軍澳壹傳媒大樓同《壹週刊》高層食飯。世事的確如棋，邊個估到CY都會到訪「梁粉」最唔鍾意嘅傳媒？而CY若然咁重視同傳媒關係，又點解會喺當選後接連向傳媒出律師信嘅？