今個馬季展開咗三個幾月後爆出個冷門，就係龍虎榜帶頭嘅竟然係蘇偉賢，蘇偉賢升做練馬師只三年，佢最出名就係表情豐富，但原來訓練馬匹亦咁有料到。
大家唔好以練馬師一定係紅褲子出身，蘇偉賢固然唔係，而退休多年的簡炳墀，未練馬之前做過輔警，另一位退休練馬師陳毓麟仲巴閉，N年前曾考入中國空軍，揸過戰鬥機㖭，所以佢有個花名叫「飛機陳」。
至於蘇偉賢入行之前職業，唔講大家未必知，原來佢年輕時曾經響美聯物業做過幾個月地產經紀，當時有位同事叫易國良，勢估唔到多年之後，蘇偉賢成為練馬師，易國良就做咗個馬主，易國良嘅愛駒「喜得福」上季更喺蘇偉賢馬房勝出，世事的確無奇不有。
家陣啲地產經紀成日因為搶生意打大交葉問上身，成為害群之馬。蘇偉賢都好鍾意郁手郁腳，不過就係玩爬山單車同游水，佢平時響馬場贏馬後成個大細路咁，份人充滿passion，俾我係馬主，都想同佢合作啦！