梁振英政府心狠手辣，全面痛擊「宣誓不當」議員，揸住釋法尚方寶劍，趕梁頌恆、游蕙禎出立法會之後，又由政府出面申請司法覆核劉小麗、梁國雄、羅冠聰、姚松炎四位議員，誓要趕盡殺絕。據擁梁大報嘅「分析」，如法庭批准免除劉梁羅姚議員四人之資格之後，還可能有進一步行動，即是用納稅人資源繼續打官司，以防某些正在申請覆核15名反對派議員資格嘅「市民」，唔夠錢打官司。換句話說，政府會逐步進逼，趕完六名反對派議員之後，再動用公帑去透過法庭驅逐多九名泛民議員。
梁振英想來係乘勝直搗黃龍，希望一舉摧毀反對派，向北京邀功，在特首選舉前，樹立牢不可破之領先地位，令任何挑戰者知難而退，扯着殲滅港獨大旗，誇啦啦大步踏入凱旋門。
為咗政治目的，癱瘓立法會運作，在所不惜。十二月五日早上梁振英去咗為「深港通」鳴鑼開道攞彩，曾俊華就做爛頭卒到立法會出席財經事務委員會會議，被迫宣讀政府立場聲明及律政司法律意見，拒絕回答劉梁姚羅四位議員嘅提問，連保皇黨李慧琼都睇唔過眼。唉，咁搞法，立法會實在難以開會，立法會法律顧問更表明不同意律政司，指法院宣判前，劉梁姚羅四人仍是立法會議員，有權提問。曾俊華做醜人被政務司與律政司綁住雙手，當然木無表情無言以對。
泛民議員正是唇亡齒寒，被逼入咗牆角，不反撲就有違常理。可以預料得到以後所有政府官員都會遵守政府立場，泛民議員駛乜客氣同佢地合作呀，唔拉布反枱點人數蓄意搞流會就有鬼咯。點知道事情峰迴路轉，十二月五日林鄭就立即轉軚，准官員回答劉梁姚羅四人之提問，十二月六日早上，梁振英就強烈暗示曾俊華係個人行動，自作決定，事先政府不知情，即係擺曾俊華一人上枱，要佢孭晒責任。
此事係CY與林鄭故意俾香蕉皮曾司長踩吖，還是曾司長將計就計，故意引起立法會反彈？在任特首就唔會關心呢啲「小事噃」，真正大事係繼續擴大反港獨事件，令佢穩陣連任，達成目標之後明年四月一日先至重新來過確定立法會補選日期，企圖一舉削弱泛民聲勢，取得立法會三分之二嘅建制派控制權，於是可以推行23條立法。成套鴻圖大計會否得逞，就要睇香港選民取向咯。