特首選戰開打在即，一向作為反梁重鎮嘅自由黨，喺換咗領導層後冇再高調講明ABC（Anyone but CY），到近日黨主席張宇人甚至獲特首梁振英委任入行會，政治性可堪玩味，亦令自由黨內部議論紛紛。
正當花生指數急升之際，自由黨周二召開嘅黨團，議決通過唔會派代表出席任何有關特首選舉嘅公開競選活動，但自由黨成員可以用個人身份出席。易志明同八方講，係大家協商後嘅決定，黨團一致同意，認為要睇吓有咩候選人同政綱後先至表態會較好。
自由黨上屆特首選舉被視為唐營，到唐唐失勢後，佢哋寧願投白票都唔益梁振英，今次黨團呢個議決，唔通係怕有人為梁振英站台而做好防風措施？但八方相信田少堅持ABC呢一點，都唔會點變，近期孖住陳浩濂出動為商界一選委戰拉票。