這晚快活谷國際騎師錦標賽首三關，分別由布文「首映」、莫雅「事勝意」及杜滿萊「聚歡笑」勝出；布文另加第七場第三關「奇真」入Q，累積18分領先進入尾關。
結果尾關第八場三班1650米，日本代表戶崎圭太騎「龍船」前置獲勝，個人在港首次贏馬。不過，戶崎拎到12分未足以令佢壓過布文呢位澳洲代表勝出本屆騎師賽。布文尾關第八場騎「僥倖」雖三甲不入冇分，但佢維持18分仍可頂到尾，首次榮膺騎師賽冠軍，兼勝出今期騎師王，捧走50萬元騎師賽冠軍獎金。
英國選手莫雅總分有14分，以4分之微做阿二，未能第三度稱霸騎師賽追平韋達及戴圖理共同保持的紀錄，莫雅獎金有20萬元。至於本屆騎師賽季軍，由同得12分的杜滿萊（意大利）及戶崎圭太（日本）瓜分，兩人各獲五萬元獎金。
莫雅此場亦盡顯其硬淨騎功，直路戶崎圭太的「勁伶利」突然外閃挨住「事勝意」莫雅，莫雅夠定紋風不動，令「勁伶利」隨即反彈撞向內側的啡燈大幅落飛馬「領航大師」，「領航大師」鞍上人韋達似怕跌立刻勒避，修正後再上為時已晚，只能入Q。同場雷神騎「風采」跑第三，法國代表巴米高繼第四場以「金磚五國」跑第四後，呢場騎「綽綽有餘」取得相同名次，四重彩派二萬五千幾。
苗禮德表示他十分需要好騎師的協助，「事勝意」也一樣，莫雅是一級高手，今仗發揮一絕，對人馬表現十分滿意，他認為「事勝意」成熟後可應付更長途程，在四班有利且仍在進步中，應該有不少上升空間。