大部份打工仔，一日三餐，有兩餐都喺街外解決，如果計埋下午茶，隨時有兩餐半。茶餐廳，當然係最方便之選。茶餐廳食物，肥膩就多人知，不過好多人會話：「做運動咪得囉！」口口聲聲做運動就得，不過到底做幾多運動，先可以抵消食物中嘅卡路里？
如果早餐食個餐蛋麵，中午食個焗豬扒飯，以為好小事？跑步消耗卡路里，每小時大約470千卡，餐蛋麵一個就743千卡，跑步要1小時30分鐘，先抵消得到。焗豬排飯，卡路里有1300千卡，非常誇張，如果跑步就要2小時30分鐘，相加就要4小時。你每日有4小時跑步嗎？或者 ，你可以連續跑4小時步嗎？
如果女同事太忙，安坐辦公室叫茶記外賣，中午食個乾炒牛河，下午茶再食西多士，又係大件事。就算有做開瑜伽，瑜伽消耗卡路里，每小時180千卡。乾炒牛河就970千卡，瑜珈要做5小時20分鐘。西多士都唔弱，522千卡，瑜伽要做3小時。食齊兩樣，每日要有做足8個小時的毅力。
每日返工都用了大半日，就算足夠運動的確可以消耗吸收的卡路里，你實際有多少時間運動？不如選擇食得健康點。
記者：李聰
攝影：周芝瑩
想輕輕鬆鬆健康?，記住留意健康蘋台
http://health.appledaily.com.hk/