零售K為逃避貴租，從威靈頓街搬往柴灣工廈，只做熟客訂購及網購，根本佢平時以公司客戶為主，在中環設店舖純粹為歷史原因及工作習慣所致，佢位公子開始接班後，就覺得在中環交貴租好唔抵，於是搬去佢兩仔爺陌生之地──柴灣。
上星期見到佢，問佢從中環人變成柴灣新街坊，慣唔慣呀？零售K話：「到咗柴灣，方知中環係另一個世界，呢度生活費便宜好多，有時平到自己不敢相信。」有冇例子呢？有嘅，零售K最近牙痛，本想預約中環相熟牙醫睇睇，點知因事忙，一直冇打到電話預約，直至某日牙痛得緊要，在街頭見到一間街坊牙醫診所，於是走入去搵牙醫止吓痛先。女牙醫一睇，就話：「K先生，你有四隻牙已經補咗，現在又有一隻牙出事，要補牙噃，你制唔制？」零售K問：「幾多錢補一隻牙呀？」女牙醫答：「四百五十元。」零售K聽咗，本來想走，都立刻留低，話：「要補呀，補牙呀！」女牙醫又話：「你原來係用白磁粉補牙，係乾淨啲，靚啲，但唔耐用，可能四年後又要再補，用傳統磁粉，黃黃地，襟用好多，但要襯番顏色嘅話，你都係用白磁粉啦。」係啦，係啦，以前中環牙醫一味話白磁粉靚，都冇同零售K講過甚麼傳統磁粉，可能係預咗佢四年後又上門幫襯啩。
哈，點知柴灣牙醫收450大元咁鬼平，零售K以後都唔會返中環搵牙醫嘞。補完，俾完錢，爽晒，女牙醫多問一句：「你喺中環補牙，幾錢一隻？」零售K口爽答：「六百五」，女牙醫嘩一聲：「貴我咁多嘅？」零售K不敢多言，急急鬆人，實情係佢在中環補四隻牙，用咗一萬元！零售K話：「唔敢講實價俾女牙醫聽，否則嚇親佢。二千五一隻與四百五一隻比較，究竟係代表租金差異還是牙醫名氣與技術差距，零售K不敢一口咬定，佢只係見到柴灣女牙醫補牙手法乾淨俐落，唔會差過中環牙醫。臨別贈言，零售K對左丁山講：「你搵日嚟柴灣搵我食飯，等我介紹本區生活費用，讓你知道你如何堅離地。」哈哈，唔駛嘞，左丁山留學泰國回來，在中環搵唔到工，於是去荃灣工廠，每日搭廠車上班，個零月後得到美國銀行聘用，立即辭職鬆人去西環返工，一年後調到中環，在聖佐治、愛丁堡、及歷山三座大廈出入（故此現在筆名叫做左丁山），當年已知道荃灣與中環係完全不同世界，西環與中環大有分別，現在明知柴灣比較便宜，都係幾難從中環走到去柴灣食飯睇牙醫嘅啫。