介紹個詞語畀大家，就係「寫波疲勞」。成日寫嚟寫去都係曼聯同皇家馬德里，或者阿仙奴同巴塞隆拿，可能一星期寫同一隊波幾次，真係悶悶哋。雖然寫強隊嘅點擊率有保證，但今次小弟同牽牛兄就轉寫吓英超下游隊，叫做畀自己少少新意。
有隊波發現季初踢4-1-4-1效果唔太好，所以毅然轉踢三中堅，小弟講緊嘅唔係車路士，而係韋斯咸；但同車仔唔同嘅係，韋咸變陣後好過一陣咁多，贏過兩場聯賽，但家陣打回原形，又再沉淪，上場仲俾阿仙奴大炒。唔好睇車仔用三中堅用到風生水起，其實干地係早有部署，例如今季買馬高斯阿朗素返嚟。三中堅唔係人人玩得起，早幾季羅渣士同雲高爾都用過，結果班兵都唔熟個陣，佢兩個中晒伏。好似韋斯咸咁，點解對阿仙奴踢得咁差？因為米查利安東尼奧同艾朗加斯威爾兩隻正選翼衞都傷咗，連高耶迪都冇埋，班替補咪玩唔掂3-4-3陣式。有時反璞歸真，打番傳統英式踢法，搵安祖卡路爾棟喺禁區，係咁吊高波埋去，可能仲啱韋咸。
韋咸今季真係令人幾失望，換咗新主場，成績仲差咗，以前佢哋都係上游分子，有得爭吓歐霸盃資格，但今季變成護級球隊。以韋咸本身班球員嘅實力，絕對唔應該排呢個位。
不過，足球唔係11個人嘅運動，而係一隊人嘅項目，如果每個球員應有實力加埋就等於球隊實力，咁曼聯應該就喺前兩名爭緊冠軍啦，呢啲正係足球嘅引人入勝之處。
文：咖喱