季初預測英超護級分子，又點會估到李斯特城、韋斯咸都有份？至於季初好多人都睇淡護級前景嘅新特蘭，小弟就未算太悲觀，始終「黑貓」呢幾季已經習慣晒護級，特別係領隊莫耶斯，佢真係具備帶領英超中游球隊生存嘅本領。
曼聯又失分，摩連奴使咗差唔多兩億鎊擴軍都係排第六；計一計積分，14場只係拎21分，比上季雲高爾同期少七分。嗱，唔好話我翻舊賬，莫天才喺13/14球季帶曼聯，頭14場聯賽都拎到22分，比𠵱家仲多一分㖭。護級球隊靠防守，新特蘭近四場就贏三場，包括上場擊敗上季冠軍李斯特城；不過，佢哋更值得欣賞係作客利物浦輸0:2嘅表現，莫耶斯講明作客晏菲路會泊雙重大巴，結果力守至下半場中段，利記先靠奧歷治神來之筆嘅入球打破僵局。如果保持呢種態度，新特蘭之後嘅前景都好樂觀。
好多人都批評領隊重用契仔，好似雲格信艾朗藍斯、韋舒亞咁，但其實球場內有自己信得過嘅人，對領隊絕對幫到手。莫耶斯今季就有安尼捷比同贊奴沙等舊部來投，特別係前愛華頓前鋒安尼捷比，靠身高優勢幫迪科爾開路，真係功不可沒。嚟緊一月轉會窗又重開，費蘭尼啱啱孭大鑊，摩連奴應該都唔會重用佢，有曼聯球迷仲叫摩連奴將費蘭尼借去查比高恩斯㖭。莫天才喺愛華頓同曼聯時期都重用爆炸頭，不如借又好、買又好，將費蘭尼解救到新特蘭，兩師徒合作，應該幫到手護級。
文：牽牛