36歲澳洲籍騎師布文近年經常來港客串，今晚佢於谷草亮相，主要為角逐國際騎師錦標賽。結果他於騎師賽首關第四場四班1000米，夥拍蔡約翰馬房次熱門「首映」後上一攻而破，個人歷史性於國際騎師錦標賽關次贏馬，而三歲馬「首映」亦一如同晚第三場廐侶「嫡愛寶」，首戰快活谷即勝，在布文胯下開齋，「首映」單Win及組合獨贏A1分別派34.5及17元。
布文之前兩度參加國際騎師錦標賽，最叻總成績第七，這晚出師谷中先苦後甜，事關佢於第二場騎「實力飛駒」大熱倒灶，隔兩場後卻在第四場勝出「首映」，此駒沿途守第五位，直路一加速即彈上無敵手，毫不受威脅下贏個半馬位，盡顯大超班馬本色。至於練馬師蔡約翰安排「嫡愛寶」及「首映」初跑谷草，結果呢對後生馬今晚分別由雷神及布文贏出，造就蔡約翰包辦第三口孖寶。
呢場同時係騎師王頭關，布文贏「首映」於騎師王及騎師賽各得12分。代表美國的鄭朗升策落飛冷門「特務飛龍」後上入Q得6分；愛爾蘭代表施慕齡騎大熱門「問鼎高峰」跑第三有4分落袋。第四名為法國代表巴米高座騎「金磚五國」，四重彩派二萬六千幾。