特首選委會倒數在即，「民主300+」各界別團隊把握最後機會四出拉票，其中法律界呢個咁重要嘅戰場，民主派有兩張名單出戰，包括由公民黨梁家傑等人組成嘅PanDem9、以及後期決定加入戰狼部隊、由風水大狀陳景生領軍嘅ProDem21名單；即係齊齊整整30人，冀一如以往全取30席。
雖然分開兩張名單，但佢哋嘅目標一致，就係力阻梁振英連任，以免社會繼續撕裂。佢哋不時團結出動，袋巾同陳景生及其他成員日前亦聽取同業意見，兼講述參選目標，尤其要全取30席以達致"One Voice, One Act, One Unity!"
眾所周知，陳景生鍾愛紅色，當日呢班民主派法律界選委參選人亦清一色紅呔上陣喎，唔通計過度過，對選情吉利？