《哪一天我們會飛》造就24歲蘇麗珊一片成名，極速上位的背後，埋藏無數後遺症。入行僅兩年，從前頭腦簡單的小妹妹，變得多愁善感，新劇裏背景複雜的女警角色更觸動情緒大爆發。私生活上，飛游學修、疑另結新歡而遭公審，令她不敢與男性朋友外出，失去友誼，「嬲自己，點解我要驚呢啲嘢？」慶幸樂天因子未被洗擦淨盡，仍能以笑聲面對感情糾紛後被褫奪女神光環的負評，「一直幾抗拒呢個稱呼，𠵱家我係咩？俾人貶落凡間？哈哈。」
撰文、造型：林嘉慈
攝影：郭賢興
攝錄：李祉澄、周樂恒
化妝：Jan Chan of Annie G. Makeup Centre
髮型：Will Yu of The Attic
活在鎂光燈下，藝人避不過向外交代私事的慣例。因《哪》片結緣、被公認為金童玉女的蘇麗珊及游學修9月底分手，矛頭直指蘇麗珊搭上男演員顧定軒，向游學修提出分手，三位人物先後公開回應。出道只有兩年的蘇麗珊，卻坦言不擅於應對，「前排有諗過呢個問題，嬲自己，點解我要驚呢啲嘢？明明同朋友出街，可能有啲我真係同佢好friend，但佢係男仔嚟，識咗好多年，驚兩個出街俾人影到，變咗唔敢出去，好似冇咗個朋友咁。」惟有學懂從中取平衡，避免與男性友人二人行。
要學語言藝術
蘇麗珊為人直接，這次專訪，冤屈氣不吐不快，「一路嘅想法係好簡單，係就係，唔係就唔係，我唔可以擘大眼講大話。以前覺得冇所謂，我咪講，但原來媒體或者網上評論嘅風氣，係令一啲唔係事實嘅嘢，變到大家覺得係咁就係咁，即係啞巴吃黃蓮，唔可以出嚟話唔係，好似辯護咁，冇辦法可以改變。係語言嘅藝術，要學，最重要唔好違背信念。」
快問快答，直問自認誠實的蘇麗珊是否單身？她說：「係單身，冇咁快。」會否恨拍拖？她說：「冇，想畀啲耐性等啱嘅人，唔想嘥時間。」分手後，不再被冠女神稱號是好是壞？她說：「一開始由頭到尾，唔覺得自己係女神，一直幾抗拒呢個稱呼，𠵱家我係咩？俾人貶落凡間？哈哈！我冇乜所謂，是但，演好自己啲戲。」
動作戲大考驗
由《哪》片淡淡然演活少年版楊千嬅，蘇麗珊在快將開播的網劇《無間道》、以兄弟相殘為主軸的電影《狂獸》，一下子跳到沉重角色。在《無》劇，她飾演熱血的新紮女警，動作場面是其中一個考驗，「我手腳唔協調，講我跑去捉賊，㩒佢落地，再將佢反手扣手釦。平時睇電視好似好流暢就做到，原來有難度，大家笑我好滑稽，又拍甩自己頂帽，又甩手。」
文戲的情緒起伏才是最大挑戰，角色的爸爸是電影版卧底陳永仁，繼承父親力捉壞人的精神，偏偏陷入愛上蠱惑仔的矛盾位，又有連場生離死別，「成日拍喊戲，要跳拍，個人跳得好緊要，入咗角色，喺邊緣度生活咁。」
情緒化好麻煩
回到現實，蘇麗珊都變得情緒化，小事已能觸發強烈情感，連閱讀龍應台整理過去多年演講內容的《傾聽》都觸動神經，「對事情敏感咗，覺得自己好麻煩，個人好跳。」慶幸她比較樂觀，不易鑽牛角尖，但控制情緒可能是成長的一部份，「以前會逃避唔好嘅嘢，有問題發生就會收埋，之後唔理，𠵱家會嘗試解決，係好嘅轉變。」
「我買唔起貴衫」
蘇麗珊彈起後，年初獲品牌邀請去巴黎睇騷，躋身國際時裝盛事，但她自認離時尚很遠，「我唔係走在潮流尖端嘅人，因為LV，去睇第一場騷，都有留意其他品牌風格，係一種藝術。好貴啲衫，我買唔起，但欣賞係賞心悅目嘅事。」她衣着簡單，平日最愛戴帽，最近就戴絨帽增加冬日感覺，原因好簡單，「保暖又增高。」
更多精采時尚內容，盡在 http://add.appledaily.com 。