蕭定一搭上馬化騰，又想搞邊科？蕭生做主席嘅HMV數碼中國（8078）噚日宣佈，同娛跃影業（天津），共同投資開發多部中外猛片。娛跃即係騰訊（700）與萬達品牌有份投資嘅「北京微影」旗下新品牌，成立兩個幾月㗎咋。
今次合作，娛跃影業佔細份，每部電影投資最多投資額25%，但會負責喺中國做宣傳、廣東、發行。而蕭定一就負責向海外各大製片商攞版權、批文、知識產權同電影於中國嘅發行權。
現時已獲得中港代理權嘅電影包括，由妮歌潔曼、海倫．米蘭、章子怡等演出嘅《轟天猛將》女生版（The Expendables，又稱The Belles）、《白宮淪陷》系列第三集Angel Has Fallen、張智霖有份演出嘅Final Score、Patriots Day等等。
娛跃影業9月底成立時，微影仲將旗下嘅票務平台「微票兒」過戶畀佢，改名做「娛票兒」，用家可以同微信錢包、QQ錢包等訂票。今年農曆新年，微影時代佔咗中國票房三分一份額。咁把炮，難怪連蕭定一都想分一杯羹。