梁特喺施政報告講咗42次「一帶一路」，但要向中央表忠，齋講係唔夠，所以成立咗一帶一路督導委員會、一帶一路辦公室等，仲搵埋前特首董建華愛將、商務及經濟發展局前常秘蔡瑩璧（Yvonne，圖）出山做一帶一路專員。
Yvonne噚日應政府新聞處邀請同傳媒見面，講述出任專員4個月嘅工作同感受，佢話梁振英同其他人都有邀請佢，覺得一帶一路潛力無限，所以應承。作為無薪大義工，佢話喺立法會開個有薪職位好難，而且一涉及錢就多口實，所以應承出任此職完全唔係睇錢份上。
佢透露委員會兩、三個星期開一次會，其中一個工作係為企業提供一帶一路國家更詳細資料，例如營商優勢、政治等，以便投資前參考。佢話一帶一路項目雖然多大型基建，但香港中小企都可以參與，如項目管理等，希望企業多加分享，同時叫大家耐心啲，因為商機、成績唔係短期內可以睇到。
好多人關心佢會唔會為特首候選人助選？佢強調專心做好一帶一路，唔會做政治工作喎。