「國際聖誕老人運動會2016」會喺12月10日（本地時間夜晚6點） 喺瑞典北部小鎮耶利瓦勒 （Gallivare） 舉行，運動會今年仲改為二人團體賽制；厲害之處係今屆港區嘅選拔賽冠軍，出現咗香港史上首位女聖誕老人Santa Kiwi（潘倩雯）。
Kiwi聯同師兄、即係上屆呢個運動會嘅冠軍Santa Apple（戚曉傑）組成最強團隊，噚日朝早已經出發去瑞典備戰。
香港聖誕團隊抵達瑞典首都斯德哥爾摩後，會到訪位於里瑟本遊樂園嘅瑞典最大聖誕市集，之後又會登上聖誕老人專機，前往聖誕老人故鄉耶利瓦勒（Gallivare），參與巡遊後就要專心作賽。唔知呢對「好」字聖誕組合，會唔會續有好成績呢？