一向多諗頭嘅香港眾志，最近又有新搞作，就係推出《2047前的2017》日曆（圖），話希望趁新一年，同大家培養「親手掀起新的一天」的小習慣。
八方睇過呢個日曆，發現當中記錄咗好多香港過去事件，例如8月30日就記低咗學民思潮2012年喺政總絕食，並宣佈佔領公民廣場，要求政府撤回德育及國民教育科嘅「成名作」。至於9.28呢一日，日曆就記低咗2014年「佔中發起人」戴耀廷宣佈佔領中環運動啟動。就連不足一個月就會到嘅1月2日，日曆都有嘢記低，就係2011年支聯會前主席司徒華因肺癌病逝、2015年多啦A夢配音員林保全逝世。日曆會喺年宵時發售，每個238蚊；網上預售就平啲，208蚊一個。