上月宣佈退休嘅前利物浦中場謝拉特，外號叫「神奇隊長」，所以有「神之手」就好合情合理。周一英足盃第三圈抽籤，謝拉特就係抽籤嘉賓之一，結果佢好好手氣咁幫紅軍抽到有主場之利，對手更加只喺紐波特郡同普利茅夫兩支乙組仔嘅勝出者，晉級機會高唱入雲，難怪「謝四」都講笑話喺利物浦搵到工啦。
第三圈主場鬥乙組仔
講起神之手，大家就唔好心邪咁諗到日本愛情動作片嘅男優，謝拉特一樣都有。佢同另一位阿仙奴名宿伊恩胡禮，周一擔任英足盃抽籤嘉賓，其中負責抽主場一方嘅謝拉特，咁啱抽中代表利物浦嘅23號波，胡禮之後再抽紅軍對手，就係紐波特郡或普利茅夫，兩軍都係乙組仔，實力認真弱。難怪抽完籤後胡禮就話：「我幫謝拉特搵到同高路普一齊工作嘅機會，佢應該好開心。」謝拉特亦微笑講：「係啦，我搵到新工嘞。」其實謝拉特返利物浦只不過係時間問題，領隊高路普講明紅軍大門永遠為佢打開，之前有傳佢返去教青年軍，只不過睇謝四想休息幾耐箒。
高路普拉隊去巴塞操練
講開利物浦，佢哋周一就出發到巴塞隆拿，進行為期三日嘅集訓，準備周六對韋斯咸嘅比賽，行程都好豐富，周一晚大軍就聚餐，大家暢所欲言講番近況，周二獲前紅軍前鋒蘇亞雷斯幫手，會入場睇巴塞對慕遜加柏嘅歐聯比賽。不過並唔係每位球員都有份，法國中堅馬馬度沙高就留喺利物浦，跟隨青年軍練習，沙高仲拍晒自己喺屋企做gym片放上個人instagram，希望打動高路普，不過據報紅軍已準備明年一月賣佢走。
其他第三圈秩序，上屆冠軍曼聯主場對英冠嘅雷丁，晉級都應該幾樂觀，不過比賽焦點係前曼聯中堅史譚，家陣已經係雷丁領隊，今次就帶隊倒戈奧脫福，全英超對碰就有侯城對史雲斯、新特蘭對般尼、韋斯咸對曼城同愛華頓對李斯特城。