南美足協公佈，會將南美球會盃冠軍頒畀遇到空難嘅巴甲球會查比高恩斯。查軍上月搭飛機去哥倫比亞作客國民體育會踢決賽首回合嗰陣，懷疑航機燃油不足而墜機，19名球員遇難，全球球壇哀悼。事後決賽對手國民體育會就向南美足協建議，將南球盃直接頒畀查比。南美足協禮拜一宣佈同意呢個決定，另外佢哋都好識做，頒番個公平競技獎畀國民體育會，獎金都有100萬美金（約776萬港元）。
巴、哥友賽為查軍籌款
香港嘅足智彩亦識做，噚日話根據南美足協嘅決定，買咗查軍拎南球盃冠軍嘅朋友會獲得派彩，同時買咗國民體育會拎冠軍嘅一樣有酌情派彩。我求大俠覺得足智彩呢個做法大方得嚟又較少爭議。此外，巴西同哥倫比亞諗住出年一月22號喺馬拉簡拿球場搞場慈善友賽，幫查比籌款；巴西足總話已經通知咗國際足協同南美足協。